政壇：舊電器派對名人話當年
代理日本電器起家嘅信興集團連日舉行多場派對慶祝六十周年，日前喺金鐘一酒店嘅酒會就展示多款已停產嘅電器，令現場似足行入時光隧道，出席酒會嘅長實執董趙國雄（趙樓神）都趁機懷吓舊，佢話上世紀五十年代，佢住喺四層高嘅唐樓，成棟樓幾十個家庭之中，佢哋第一個用電飯煲取代瓦罉，搞到兄弟姐妹個個搶住洗米煮飯，鄰居亦群集圍觀電飯煲卜卜跳嘅盛況。信興集團副主席蒙德揚就話第一代黑白電視機有鎖最特別。
蒙德揚笑指第一代黑白電視機備有機門同鎖匙，夠晒特別。
尋日沙田馬場舉行樂聲盃賽事時，主人家繼續玩懷舊，以懷舊造型收音機贈送賓客。香港大學校務委員會主席梁智鴻笑笑口話，佢讀大學時正正係聽呢款收音機。
