政壇：毓民叫肥佬黎落地獄
資訊科技界立法會議員莫乃光上周三喺立法會提出動議，要求引用《立法會（權力及特權）條例》（特權法）要求政府交出審批免費電視牌照文件。議員黃毓民就對法律界議員郭榮鏗提出嘅修訂動議投咗棄權票，點知《蘋果日報》翌日頭版就將毓民張相同反對修訂嘅建制派擺埋一齊，完全無視佢喺莫乃光嘅原動議投贊成票。毓民狠批壹傳媒肥佬黎旗下嘅《蘋果日報》係垃圾，仲話肥佬黎應該落地獄咁話。
黃毓民
《蘋果日報》上周五將毓民張相同建制派嘅擺埋一齊，搞到明明對莫乃光個原動議投咗贊成票嘅毓民好激氣，尋日就喺電台節目上解釋，話自己反對郭榮鏗嘅修訂係因為有關修訂唔攞行政會議文件同商業機密資料，等於變咗冇牙老虎，搵唔到真相嘅！佢仲大鬧《蘋果日報》喺度混淆視聽，搞到人以為佢轉軚黐埋建制派度，直斥《蘋果日報》「呢啲報紙垃圾嚟o架，講過九十幾次，肥佬黎應該落地獄，呢啲人用私怨掩蓋真相！」
