政壇：愛港力嚇退龍獅旗

愛護香港力量（愛港力）尋日就拉隊去公文袋毛孟靜（阿毛）位於何文田嘅議員辦事處踩場，點知另一班青年似聞風而來反擊，佢哋本來預備咗「龍獅旗」，打算同愛港力嘅支持者打對台，點知人丁單薄，到最後連「龍獅旗」都未舉過就落荒而逃，現場秩序一度混亂，但始作俑者毛孟靜全程都唔見影，話之佢哋吵得翻天覆地。

「Dislike」貼紙籲下台

愛港力上月底已經拉隊去咗另一個「香港本土」成員范國威嘅辦事處踩場示威，尋日就輪到阿毛。示威人士喺阿毛嘅何文田議員辦事處外嗌口號，力數阿毛「經典十宗罪」，包括反對阿毛高呼「拒絕大陸化」、「源頭減人」等撕裂社會嘅口號，又狠批阿毛嚴人寬己拒拆僭建，仲鬧埋阿毛所屬嘅政黨濫興訴訟全力反中等行為。

示威者其後又高呼「毛孟靜，日反夜反無時停」等諷刺口號，狠批阿毛「大半生依靠排內媚外、反中亂港搵食」，直指要阿毛痛改前非機會近乎零，然後將象徵「下台啦」的「Dislike」貼紙貼喺印有阿毛個樣嘅橫額上表達強烈不滿，隨後仲喺附近派單張力數其罪狀。

愛港力示威時，一度與在場圍觀市民互相指罵，需在場警員勸喻調停。示威期間一度有幾名手持龍獅旗嘅年輕人聞風而至，疑似向愛港力成員挑機，但佢哋得幾個人，同驟眼望都有逾二十人嘅愛港力冇得比，結果呢幾個青年未及展示手上龍獅旗，就急急收隊，恍似落荒而逃。