年年歲歲花相似，歲歲年年人不同。唔經唔覺，立法會換屆已經一年，議事堂地方大咗，議員換咗，政治版圖變咗，但有一樣嘢就永恒不變，係乜嘢？咪就係懶惰風氣囉。唉，民意代表年年成為懶蛇代表，敷衍塞責，究竟知唔知醜！

嗱，有監察組織發表一年一度考勤報告，唔少議員被點名狠批偷懶怠職，有人隱形唔開會，有人開會唔發言，有人少質詢，有人少投票，有人甚至離譜到二十二年來從未提過一條議案，你話係咪懶到出汁吖？本來呢，新人事，新作風，立法會換咗新面孔，大家以為有機會煥然一新啦，點知又係換湯不換藥。新簇簇嘅議事堂依然係烏煙瘴氣，最大黨派淪為遲到早退快閃黨，最大勢力成為尸位素餐啞議員，咁搞法，立法會想唔做「垃圾會」都唔得啦。

其實，垃圾會烏煙瘴氣，代議之士變惰懶之士，大家都睇到麻木咯。正所謂，年年考勤，年年如是，立法會養懶蛇，冇得救o架嘞，最令人莫名其妙嘅係，政客開會懶到出汁，但係講到搞風搞雨咯喎，即刻龍精虎猛。呢，新一屆立法會開鑼以來，議事廳日嘈夜嘈，幾乎無一日寧靜，政客係唔係都話要動用特權法，簡直不知所謂。係人都知，特權法係立法會嘅「尚方寶劍」，除非係重要事項，否則唔可以隨便出鞘，點知過去短短一年，動議引用特權法嘅次數幾乎等於回歸十六年嘅總和，政客不務正業，一味抽水，香港有乜辦法唔七國咁亂吖？

咁講啦，考勤報告十年如一日，如果話今屆立法會有乜唔同，咪就係更加吵吵鬧鬧，更加烏煙瘴氣囉！

回歸十六年，香港不斷沉淪，固然有好多原因，但係政客終日搞事，有破壞冇建設，亦係其中一個主要原因。大家不妨睇吓，有人嘅工作唔係開會，而係鼓吹市民上街；有人嘅職責唔係監督政府，而係號召群眾包圍政府。政客熱衷於搞政治，導致社會爭拗不絕，撕裂不斷，再咁落去，香港點會有前途呢？好簡單，上海自貿區橫空出世，嚴重威脅香港金融中心地位，政客有冇關注過吖？唉，佢哋只係關心自己點樣出位咋！

咪話太一叮唔提醒吖，議員嘅責任係為民喉舌，監督政府，偷懶成性固然要戒除，而唯恐天下不亂嘅心態更加要改變，否則你哋遲早畀市民唾棄嘅咋，叮！

第一手消息請下載on.cc東方互動iPhone/iPad/Android/Windows Phone Apps