SUN搞作：打橫嚟講：做大生意？講食力！
嚟緊農曆年宵攤位的熟食檔，以五十四萬成交，破咗十二年新高，畀一間連鎖性集團投得。舊年，同一位置，係以底價（無人出價競投下）三十萬出貨，即今次高幅增長八成，真唔講得笑，咁是否可以反映今年經濟好轉，入市者睇好市道呢？又唔係喎！投得的檔主話，若能歸本，便當贏了！此話何解呢？
原來，今劑重錘出擊者，是首次參加維園年宵市場的，他們的計劃，只志在「宣傳」啫！咁又係呀！五十幾萬租金成本，只做七日生意，若mark up利潤為十個巴仙，即每日要做七十七萬生意額，才能掙回租金成本，仲未計貨價、人工和燈油火蠟，你話要賣幾多串魚蛋至「歸本」呢？但佢哋話會推售公司的新產品，博「蝕頭賺尾」！
其實，佢哋唔使開檔，今日，已賺凸啦！試問一間公司要花幾多廣告費，至可以登晒全港咁多份報紙呢？依家，只不過區區五十四萬，已將佢哋公司個寶號全見報，真抵！
又一次證明，資本主義社會係被大財團壟斷的！
經濟學上，有分自由經濟和市場調控。自由經濟係自由競爭，弱肉強食，講實力的；市場調控，多由政府政策干預，一切話事權任由政府把持，但最後，也多是傾斜到利益集團那邊去的！
年宵市場，本是當地小商戶（小花農）一年一度賺點小利的場所，但在經濟利益大前提下，又畀大財團覬覦(目及)中，弱勢者上訴無門。不要以為共產國家才會干擾自由經濟，表面實行自由競爭的世界，政府也隨時會一面倒的偏幫有財有勢的大集團。
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
