小吉爸爸種菜。某日，Ｘ政府為「促進經濟發展」，決定擸小吉屋企塊菜田起高速鐵路。吉爸以為人總會有禮義廉恥，就搵咗某自詡「禮義廉」嘅議員幫手，食過蛇宴後，議員承諾：「我會投良心一票！」幾個月後，小吉爸爸無咗頭家。

小吉長大後，做社工幫窮人。某年，「禮義廉」同「閒姐」露出親切嘅笑容，同小吉講，佢哋好鍾意派米畀老人家，好想幫弱勢社群。嗰年嘅立法會選舉，小吉投下良心一票。數年過去，小吉發覺，窮嘅人愈嚟愈窮，條街仲多咗好多人乞食添。

小吉成家立室嘞。年月逝去，佢成為咗一個普通人，普通到一個招牌跌落嚟都會扑死幾個嗰種。小吉安守本分，追求和諧穩定，最大嘅娛樂係放工返屋企睇電視，佢好厭倦周而復始嘅雞汁、BBQ大結局，好想睇啲新嘢。當佢知道冇得睇期待咗好耐嘅電視，為着良心，小吉走上街望住街頭的大銀幕，佢見到一班過去話要「幫自己」嘅人，全部支持雞汁送飯。頃刻，小吉明白到咩叫良心狗肺，大哭一場。

第一手消息請下載on.cc東網iPhone/iPad/Android Apps