SUN搞作：少膽虫手記：壹地都係菌
少膽虫陪淫賤黎梳乎梳乎後，甫進公司門口氣氛已奇奇怪怪，連平時經常出聲的肥豪，今天都異常地安靜。「發生乜事？啲人咁靜嘅？」淫賤黎不禁開口問。「腦細，佢哋個個都戴晒口罩喎！」少膽虫機智地回答。「佢哋係咪詐病、偷懶唔做嘢咋？」淫賤黎語帶怒氣，望實肥豪。「東莞有幼童染H7N9禽流感，我哋唔及早預防，就好易中招o架！」肥豪細聲說罷，雙手戴番好個口罩。
「咁大鑊！又有流感？」淫賤黎表情詫異，再嚷道「快啲攞口罩畀我，少膽虫！」少膽虫聽畢，急急去攞口罩。
「嗱，唔好郁，企定呀腦細！」少膽虫溫柔萬分替淫賤黎戴罩。「掂啦，戴咗罩，乜菌都唔使驚！」少膽虫得戚道。「乞嗤！乞嗤！」淫賤黎突然打噴嚏，仲流鼻水。「係喎，少膽虫，你都要戴番個口罩喎，容乜易傳啲病畀我！」淫賤黎不滿地說。
少膽虫心諗，「《爛果》一向烏煙瘴氣，啲菌多到防都防唔切，而依家最大嘅菌咪擺係面前囉！」
