城中鏡：胡應湘瞓身搞合和二期
近期本港一眾發展商爭住推盤，咁啱由信置、合和同市建局合作嘅灣仔囍匯二期，早排就獲批咗預售樓花，但合和系主席「哥頓」胡應湘就話，推盤呢樣嘢就交畀阿仔胡文新（合和實業董事總經理）同信置主席黃志祥搞。哥頓話依家佢主力係要搞掂合和二期，等一拎到開工紙，就會親自落地盤搞。佢又話自己都好想退休，但合和二期係佢呢三十幾年心血，佢唔止係對自己、仲係要對灣仔負責，依家最想係將合和二期起好！
胡應湘（左）尋日喺歡迎會上同克羅地亞第一副總理Vesna Pusic言談甚歡。
身兼克羅地亞榮譽領事嘅佢尋日搞咗個歡迎會，歡迎克羅地亞第一副總理Vesna Pusic來港，邀請咗唔少商會代表、其他國家駐港領事出席。哥頓話克羅地亞經營環境都好過香港，香港依家太多爭拗，香港最好嘅地方係自由，但居住環境就係亞洲最差，目前政府最重要係要增加土地供應，建議多用儲備去幫助低收入階層。
