成功人士背後總有一段辛酸史，好似大型承建商金城營造早前舉行創業五十周年晚宴，身兼廣東社團總會主席嘅金城營造主席KK王國強致詞時自爆，父親王錦輝曾經喺內地開過臘腸店同棺材舖，來港後做過看更等散工，後來承包私人工程開公司。

王錦輝（坐輪椅者）四代同堂齊分享半世紀嘅成果。後右三為王國強。

許漢忠（左）避談離職後去向。右為金至尊主席黃英豪。

中電企業發展總裁莊偉茵同老公黃楚權拍拖到賀。

二十五年前KK接棒時公司只得幾個職員，所以佢唔係含住金鎖匙出世。九十一歲高齡嘅王錦輝精神唔錯，致詞時聲如洪鐘，好多賓客爭相同佢道賀。

許漢忠玩神秘

早前宣布辭職嘅機場管理局行政總裁許漢忠都有現身，問佢做乜辭職？佢笑笑口答話：「退休啫！」但係當時佢發聲明話想喺事業上作其他發展，咁點算退休呀？佢笑而不答，認真神秘。同場仲有大埔慈山寺董事局成員李焯芬，問佢市民幾時至可以去參觀全球最大嘅戶外青銅觀音像，佢話寺廟工程埋緊尾，預料明年開幕喎！

太子珠寶鐘錶主席鄧鉅明亦帶埋次子鄧亦棋去捧場。講起訪港嘅內地旅行團驟減對零售業影響，鄧鉅明擔心衝擊將於明年慢慢顯現，話公司惟有調整策略面對逆境。

第一手消息請下載on.cc東網iPhone/iPad/Android Apps