前晚立法會審議引用《立法會（權力及特權）條例》動議要求政府披露免費電視發牌相關文件時，一班準備投反對票嘅建制派議員，竟然被包圍立會大樓嘅市民嚇倒，散會後要咁走秘道、乘搭由警方開路嘅旅遊巴離開。

設計圖片及對白

鑑於年前立會審議高鐵撥款時被市民包圍嘅前科，前晚市民包圍立會一役，秘書處早有安排，兩日前已講明會安排二十四座旅遊巴接載有需要嘅議員離開，仲有警察開路，確保安全。所以就算前晚門外群情洶湧，十幾位議員都冇有怕，全部坐旅遊巴「逃亡」。

焗搭旅遊巴離立會

不過，建制派唔係個個都坐旅遊巴，原來立會地下停車場有一條「秘道」，呢條秘道平時有一幅銀色捲閘阻隔，一開閘就可以由立會停車場通往政府總部停車場，議員就可以靜雞雞駕車由政府總部出口離開，就算幾多人包圍立會，都傷唔到佢哋一條頭髮啦！據講議員陳恒鑌、陳克勤、鍾樹根都靠秘道駕車離開。咦！佢哋就走秘道，點解丟低黨友葛珮帆同李慧琼搭旅遊巴，咁好關照呀？

至於建制派兩大頭目譚耀宗同黃國健就寧願喺立會留宿過夜，雖然佢哋聲稱有沖涼同換衫，但唔知有家歸不得嘅心情係點嘅呢？

第一手消息請下載on.cc東網iPhone/iPad/Android Apps