政壇：地政總署爆冷奪嘉許獎
申訴專員公署多次批評地政總署無做好監管工作，又經常出現非法霸佔官地。不過，尋日「2013年申訴專員公營機構嘉許獎」中竟然「爆冷」，地政總署有份獲頒嘉許獎，就連地政總署署長甯漢豪都感到驚訝，仲用「驚喜交雜、愛恨交纏」形容平時排山倒海嘅工作，但每當見到工作有所改善時都會好開心。
黎年（左）向自稱「好閉翳」嘅甯漢豪頒公營機構嘉許獎。
今年嘅公營機構嘉許獎，渠務署、路政署同地政總署都係得獎機構之一，而且仲係首次獲獎。不過，最大驚喜嘅相信係地政總署，事關該署每年都收到成二百宗轉介，真係慢啲手腳都唔得，今次就表揚佢哋開展服務嘅新措施，同埋研究處理非法使用政府土地嘅法定權力限制。
甯漢豪上台領獎時都話好驚訝，仲透露曾向申訴專員黎年大呻，話收到咁多轉介好閉翳，但專員都好識安慰佢，叫佢唔使驚，因為佢哋唔係收最多投訴嘅公營機構喎！原來一山還有一山高，咁邊個公營機構係最多投訴嘅呢？
