政壇：舊聲明當寶 莫乃光(火羅)爆
立法會資訊科技界議員Charles莫乃光近日為免費電視牌照風波頻頻曝光，而立法會尋日下晝就否決咗由佢提出引用《立法會（權力及特權）條例》索取行政會議相關嘅討論文件，得出咁嘅結果，外界都話一如所料，相信Charles都唔例外，亦唔會感到意外，但喺尋日朝早就發生咗一件相信連佢都始料不及嘅事。
設計圖片及對白
話說立法會尋日九點鐘續會，繼續辯論特權法嘅動議，而未夠十點鐘，Charles突然行近立法會會議廳外嘅記者咪兜，示意佢有嘢要講，之後就手持一張聲明，自稱啱啱收到由香港電視主席王維基發出嘅最後通牒，要求政府喺下晝一點前公開交代發牌真相，跟住就批評政府至今依然無誠意解決問題。佢仲解釋王維基之所以要臨時發出聲明，可能係因為被部分建制派議員不斷「抽水」，所以特登出份聲明以正視聽，要求政府公開交代發牌真相。
面懵懵道歉走人
講到呢度，有記者就問Charles手上份聲明係幾點收到，同埋聲明發出日期係幾時，Charles然後望望張聲明，先至發現原來自己手上份聲明係日前發出，驚覺擺咗個大烏龍，佢惟有面懵懵講聲唔好意思，跟住尷尷尬尬講多幾句之後索性走人。
老實講，佢連日嚟都有跟進事態發展，冇理由察覺唔到，一係佢發緊夢，一係就跟唔足，咁樣將舊料變新料講，真係(火羅)爆。
