消防滋擾傳媒 官僚愈描愈黑
古人話，公道自在人心，真係冇講錯。呢，消防處早前以收到一封電郵投訴為名，高調派人踩上東方報業中心伺服器房，調查所謂嘅灑水系統問題，結果證實投訴不成立。呢種刻意針對傳媒、打壓新聞自由嘅醜行，引起各界強烈譴責，立法會議員陳偉業仗義執言，向當局提出書面質詢，要求解釋有冇濫用職權滋擾傳媒。好嘞，你估當局點樣解畫吖嗱？一句講晒，廢話連篇！
嗱，保安局局長黎棟國嘅書面答覆一味顧左右而言他，既冇交代點解未經查證就上門滋擾傳媒，亦冇交代會唔會追究有人惡意投訴嘅責任，結果答咗等於冇答。正如有人質疑，如果消防處日日接到一封電郵投訴，係咪日日都要上門調查吖？如果有電郵投訴禮賓府或滙豐銀行金庫消防系統有問題，消防處又敢唔敢派人踩上去呢？老實講吖，如果惡意投訴唔使負責任，等於鼓勵報假案，咁豈不是天下大亂，「999」報案中心隨時畀人打爆都似。
事實證明，醉翁之意不在酒，消防處調查東方報業中心嘅灑水系統係假，打壓正義傳媒至係真正目的。正所謂，欲加之罪，何患無辭，東方報業集團過去先後十二次遭政府唔同部門以收到投訴為名，肆意滋擾，除咗消防處之外，仲包括警務處、衞生署、食環署、影視處、淫審處、私隱公署、平機會等，罪名五花八門，千奇百怪；甚至連世界著名藝術作品大衞像亦被指「不雅」，簡直荒謬絕倫！
講到荒謬，當然唔能夠唔提當局嘅選擇性檢控。最經典嘅例子係，○五年底《東方日報》及《太陽報》刊登一輯外國女星Kelly Brook沙灘照，打晒格仔仍被淫審處評為二級不雅，而刊登同一輯照片嘅《蘋果日報》就被評為一級非不雅；更離奇嘅係，喺香港有售嘅外國雜誌《NOW》刊出同一輯照片，既冇打格仔，亦冇包膠袋，結果連送檢都慳番。同樣嘅照片，居然有三種唔同標準，如果話唔係選擇性檢控，細路仔都唔信喇。咁多年來，東方報業受到不公平對待罄竹難書，選擇性針對已經係小兒科，最令人莫名其妙嘅係贏官司輸訟費，問你服未！
最好笑嘅係，早前有大學發表調查報告，指香港傳媒愈來愈自律喎。其實，依家嘅問題唔係傳媒自律，而係港府打壓傳媒，製造白色恐怖，知冇？大學與其嘥時間做埋呢啲不知所謂嘅調查，不如研究吓港府點樣侵害新聞自由仲好過喇。
咪話太一叮唔提醒吖，家陣香港烏煙瘴氣，七國咁亂，如果再失去新聞自由，冇咗第四權嘅監督，只會更加混亂，更加沉淪嘅咋。所以話，對於消防處等部門刻意滋擾正義傳媒嘅醜行，絕對唔可以姑息o架，叮！
