城中鏡：阿里CEO剝衫「征南極」
阿里巴巴推出「來往」大撼騰訊嘅「微信」，內地兩大科網巨擘埋身肉搏，大家除咗有花生食，原來仲有阿里巴巴一班高層嘅冇打格肉照睇添，相中見到阿里巴巴嘅CEO陸兆禧赤裸上身，拎住支咪演講，集團戰略部總參謀長曾鳴一樣打大赤肋，為陸兆禧呼叫吶喊，群情似乎相當激昂。
陸兆禧喺「遠征南極」誓師動員大會上，揚言要赤身打到南極去。
聽聞現場係阿里巴巴內部一次「遠征南極」嘅誓師動員大會，「企鵝」就係騰訊嘅象徵，主席馬雲之前已經講過話要去南極洲逛逛，連員工都開始叫自己做「南極遠征軍」，今次呢班男高層又除晒衫，揚言要赤身打到南極去，擺到明向騰訊下戰書。不過人家企鵝嘅老家係南極，阿里巴巴一班高層故意唔着衫話要打去人家地頭，唔通真係一啲都唔怕凍？
