剛過去的星期日，東方報業集團旗下的《東方日報》和《太陽報》之頭條要聞，就有關香港電視發牌準則，引述「權威消息」，首次披露香港政府否決發牌的理據，認為「本港免費電視市場的廣告收入」，難以支撐多過四間電視台同時生存；另一「死因」乃係「考慮申請者的財政持續性」。

消息曝光後，同日上午，行政會議非官守召集人林煥光出席商台節目《政好星期天》，大肆批評「權威消息」的報道，佢話：「我大膽同公眾講一句，以我在報章媒體上睇到嘅消息權威人士意見，大部分，我敢講大部分係跟我哋喺行會討論嘅事實唔同，所以請大家小心，亦都有唔少評論，連最基本嘅行會運作方式亦唔懂……」咁話喎！

事實係點呢？

星期二，香港政府發出聲明，講解《行會考慮免費電視發牌因素》的「四大評審準則」和「十一項因素」中，就有「財政能力」和「免費電視市場的持續經營環境」之評估因素，證實東方報業集團引述的「權威消息」正確無誤啦！點解呢件林煥光竟可誑言話有傳媒報道「扮權威」呢？唔該解釋吓好喎！

林煥光亂噏嘢並非首次，仲好扮清流，常愛跟香港政府玩切割。有關發牌風波之事，早前便試過話行會只是「顧問」角色，畀意見o架啫！最終都係由特首（一人）拍板，即將個鑊推給特首，同佢劃清界線也！依家，卻又「做代表」出嚟護航，反口覆舌美言話：行會的決定係集體負責，「不可能」與特首割席喎！同一個人兩嘴三舌，唔係反覆小人，就係精神分裂囉！行會養埋啲咁嘅「清流」，唔內亂就有鬼也！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps