政府早前宣布將西灣、金山同圓墩三幅土地納入郊野公園範圍，結果惹來鄉民反彈，狠批此舉等同強搶鄉民私人土地。立法會就《2013年郊野公園（指定）（綜合）（修訂）令》嘅小組委員會尋日早上開會，點知之前冇出席過嘅新界鄉議局主席劉皇發突然現身。

設計圖片及對白

當發叔一開始講嘢時，就被主席Cyd何秀蘭提醒必須申報利益。發叔坦承喺新界有「相當唔少」嘅零零碎碎土地，但阿Cyd就話發叔申報得唔夠詳盡，最後要發叔確認喺上述三幅土地上冇擁有權益，先可發言同提出動議。

發叔之後話《基本法》保障私有產權，強調新界佬其實都好聽話，而業權人亦唔係僵硬反對將土地納入郊野公園，但政府今次係官逼民反，萬萬不能接受政府以「大石砸死蟹」嘅手段，強行褫奪私人土地不作任何合理補償。佢又話明明鄉議局、西貢區議會同鄉事委員會都反對將大浪西灣納入郊野公園，仲有西灣村民提出司法覆核，但政府仍一意孤行。

最後發叔動議以小組委員會名義提出廢法，可惜委員會未到逐條審議階段，加上發叔嘅修訂文本又寫得唔清唔楚，唔符合修訂文本嘅基本要求，所以佢焗住將動議改為意向式表達。雖然最後都通過咗動議，但動議並無約束力，而廢法亦要經過大會投票先可通過，確係突襲變甩轆。睇嚟發叔今次「發威」都係向村民表態或交差居多，實質作用唔多大喇！

第一手消息請下載on.cc東網iPhone/iPad/Android/Windows Phone Apps