政壇：超級梁粉賣CY眼鏡

會展尋日開始一連三日舉辦眼鏡展，但喺過百個參展商之中，竟然有參展商以特首梁振英嘅名字縮寫「CY」為名，其檔位仲掛住幾張同一款式嘅老闆娘同CY合照，莫非呢間公司係CY開嘅？原來只係一位超級「梁粉」想透過賣眼鏡，將部分盈利做慈善，從而支持CY喎。不過，呢個CY品牌嘅眼鏡售價二千多元，唔知有冇市場呢？

「梁粉」陳玉娥推出CY品牌眼鏡撐CY。

陳玉娥

自稱由超級「梁粉」組織而成嘅愛中港青年文化社團聯創會副主席「娥姐」陳玉娥有份合資嘅眼鏡公司，尋日喺會展眼鏡展參展，並舉行開張儀式。娥姐話佢喺眼鏡界打滾十幾年，首次出產自家設計嘅CY品牌，有啲眼鏡款式仲配合珠寶設計，仲有可摺疊嘅款式，摺疊款式代表住CY及獅子山精神，能屈能伸，迎難而上。