立法會尋日開會討論係咪引用《立法會（權力及特權）條例》，要求政府交出行政會議討論免費電視發牌嘅文件，提出動議嘅資訊科技界莫乃光喺宴會廳向建制派議員大派由港視工會送出嘅「誠實豆沙包」，叫佢哋食完後講真話投贊成票。但建制派唔領情，雖然工聯會黃國健有攞豆沙包，但轉頭就轉送畀助理，又話以為嗰個係叮噹最鍾意食嘅豆沙包而非「誠實豆沙包」喎！

黃國健攞咗莫乃光一個「誠實豆沙包」，然後轉贈畀助理。

左腳受傷嘅「長毛」梁國雄坐住輪椅返立會開會，但佢嘅座位就由原來嘅最後面調去最前面，而電子投票系統亦要相應作出調整。唔單止咁，長毛一出一入會議廳都有幾個保安員傍住，仲好服侍過佢被人趕出去嗰陣時。

第一手消息請下載on.cc東網iPhone/iPad/Android/Windows Phone Apps