好多食肆老闆都話好難請洗碗工，喺灣仔開設車仔麵檔大半年嘅民政事務局前常秘「媽打」李麗娟嘅仔Chris劉堃都大嘆請人難。Chris要樓面打雜一腳踢，每日做十一小時無停手，更因請唔到人洗碗，焗住自己走入廚房，日洗兩百隻碗。

劉堃慨嘆洗碗工難請，不時走入廚房做替工。

投資逾百萬元首次創業嘅Chris，日前出席一個文化活動，講起生意經，大嘆有工冇人做，最頭痛莫過於請唔到人洗碗。佢話試過唔夠人洗碗，廚房一度堆積兩百隻碗，見客人冇碗用，平日唔多使做家務嘅佢，第一時間摺起衫袖，將雙手插落水缸度洗呀洗，洗足一日冇停手。

起初佢連手套都無戴，想話洗快啲，但洗咗幾日，皮都皺晒，夜晚返到屋企，依然一陣梘水味，阿媽睇見心都痛埋。佢就笑笑口話濕濕碎，心願係將車仔麵文化發揚光大，諗住喺跑馬地物色新址開樓上舖。佢坦言暫時仍係「白做」冇糧出，幸好每日兩餐有至愛豬紅、蘿蔔同豬皮慰勞自己，即時開心晒！

第一手消息請下載on.cc東網iPhone/iPad/Android/Windows Phone Apps