政壇：新政助唔「跳船」

其實Jade同Zandra都係已婚人士，而且有小朋友。前車可鑑，於是有記者問Jade會否好似Zandra咁，以照顧仔女為由離開政府時，Jade自爆媽媽幫手照顧小朋友，又話兼顧工作同家庭係在職媽咪面對重大抉擇，似乎暗示入得政府，就唔會有「跳船」打算。

老實講，Zandra離開政府呢個熱廚房後，一個屈尾十就走咗去出任兒童無限學校（九龍塘）助理總監（研究與發展），真係全世界都畀佢呃晒，令外界覺得佢係假借湊仔為名而跳船，搞到政府好尷尬，如果再嚟多單，政府嘅管治威信何在？

與夫中港日擁物業

除咗有小朋友之外，其實Jade同Zandra都有好多共通點，首先二人同為三十會成員並且一早認識，而Jade嘅家姐同Zandra仲係中學同學添！其次二人嘅政治敏感度好高，同樣喺上任之初就申報個人利益，夠晒穩陣。

Jade只係履新幾日，我哋就發現佢已將個人利益申報放上網。佢老公姓何，從事金融風險管理顧問工作，二人合共擁有四個住宅同商業單位，分別遍布中港同日本，其中兩個分別係Jade名下嘅廣州商業單位，同佢老公位於日本東京嘅自住單位，睇嚟佢未入政府前都算投資有道。