禽流感步步進逼 新沙士虎視眈眈

嗱嗱嗱，廣東省繼今年八月出現首宗確診個案後，又有一名居於東莞嘅三歲男童證實感染H7N9禽流感病毒，而且同佢有密切接觸嘅人士之中，三人出現流感徵狀，包括父母及哥哥。今次係咪人傳人暫時未知，但病毒不斷變種，冇人可以排除任何可能性o架。

小數怕長計，內地至今已有一百三十七宗人類感染H7N9禽流感個案，其中浙江佔咗四十八宗，而廣東相隔三個月後亦發現第二宗個案，對上一宗發生喺惠州，病人已告不治，絕對唔講得笑吖。

大家都知嘞，東莞唔只距離香港近，亦係港人熱門旅遊地點，而且有唔少港人工作及居住，兩地交往頻繁，唇亡齒寒咯喎，家陣東莞出事，香港亦隨時失陷。唔係太一叮杞人憂天o架，禽流病毒傳播迅速，無遠弗屆，首先喺華東爆發，好快就傳遍大半個中國，家陣連廣東亦連續中招，如果病毒真係變種出現人傳人，香港想獨善其身都幾難。正如專家指出，只要氣溫低於二十度，禽流感病毒就會快速散播，家陣已經係深秋，天氣逐漸轉涼，禽流感對本港嘅威脅正不斷增加，真係要打醒十二分精神呀！

正所謂，福無重至，禍不單行。除咗禽流感之外，沙特早前又新增一宗新沙士個案，患者發病四日就死亡，證明呢隻病毒嘅殺傷力真係非同小可。大吉利是講句，萬一禽流感同新沙士左右夾擊，後果真係不堪設想。

正如古人話齋，弗備難，難必至。香港作為一個國際都會，日日都有大批來自世界各地嘅旅客，只要防疫工作稍一鬆懈，乜嘢奇難雜症都會乘虛而入。想當年，由於港府後知後覺，中門大開，廣州一名患病嘅教授將沙士病毒傳入本港，奪去二百九十九條人命，慘痛教訓仍歷歷在目，希望港產官僚能夠吸取教訓，加強把關，唔好再甩甩漏漏喇。

咪話太一叮唔提醒，近年香港時運低，政治爭拗特別多，有人唯恐天下不亂，成日興風作浪，加上港府施政無能，連免費電視發牌都搞到滿城風雨，呢個時候最容易招災惹禍o架。總而言之，禽流感步步進逼，新沙士虎視眈眈，唔該港產官僚醒醒定定，防疫寧緊勿鬆吖，知冇！