城中鏡：王健林「平價」奪畢加索畫
內地企業近年變身「錢吉思汗」，頻頻用銀彈策略遠攻海外，唔少國際拍賣會都可以見到內地有錢人身影。好似新進《福布斯》中國首富王健林掌舵嘅萬達集團，禮拜一就喺佳士得紐約拍賣會上，用2,816.5萬美元（接近2.2億港元）撼贏超過十位國際買家，搶到畢加索嘅代表作《兩個小孩》。唔好睇成交價比估價高咗一倍多，萬達話其實佢哋心目中價位係5,000萬美元，今次算係執到平貨！
王健林撼贏逾十位國際買家，搶到畢加索嘅《兩個小孩》。（資料圖片）
王健林早排榮登國產富豪榜首，有人計過，淨係喺過去一年，佢嘅財富就增長咗372億（人民幣．下同），簡單啲講，即係平均每分鐘賺七萬，想買架平治房車，大概只需要十分鐘時間，難怪首富次次出手都係億億聲。
王健林嘅嗜好係收藏名畫，早前佢捐過幅徐悲鴻嘅畫作做慈善拍賣，由騰訊主席馬化騰以1,700萬元投得。萬達嘅藝術品收藏負責人郭慶祥話，今次喺佳士得紐約拍賣會投得畢加索代表作，係萬達收藏世界級藝術家作品嘅第一步，嚟緊仲會繼續收藏唔同風格嘅藝術家作品。
《兩個小孩》創作於1950年，畫中人物形象係畢加索三歲兒子同一歲女兒，呢件作品由完成到畢加索去世後，一直懸掛喺畢加索工作室嘅顯眼位置。
