早前同星級名廚Harlan Goldstein鬥減肥籌善款，結果以八磅之差輸咗嘅「廚魔」Alvin梁經倫，前晚兌現承諾，到Harlan及國際小母牛香港分會籌款委員會主席Simon杜振源開設嘅餐廳做一晚女侍應。肉感十足嘅Alvin着上黑色吊帶短裙配襯白色圍裙，女僕扮相勁銷魂。Alvin搞笑咁話，着上性感女服後，下身感覺前所未有咁涼快喎！

扮肉感女僕嘅Alvin（左）有紳士Harlan（右）相伴托大腳，笑不攏嘴。

Alvin當眾摷胸執番好走位嘅檸檬，所以話女人唔易做。

大炮裝靚紅酒為賓客增添飲興。

葉澍堃（左）同杜振源（右）拍住做善事，齊歎白松露美食，默契十足。（受訪者提供）

檸檬裝胸作勢

當晚有四十幾位城中名人齊去見證Alvin嘅女僕風采，一入場就被Alvin嘅搞笑造型吸引，個個爭住同佢影相。難得名人咁捧場，Simon就出動大炮裝靚紅酒同矜貴白松露宴客，座上客包括立法會議員梁君彥、林健鋒、靚仔醫生莫樹錦同馬會大董葉澍堃全家。至於兩位名廚就滿場飛，逐一為賓客刨白松露。

不過，女僕Alvin就更加忙，事關佢用檸檬裝假狗，胸前每邊裝兩、三個檸檬，點知啲檸檬經常走位，搞到佢周身唔聚財，後來索性當眾摷胸執番好啲檸檬，認真搞笑。佢話最好有大大隻嘅西柚代替檸檬，就唔使咁論盡啦！

Simon話應承如果Harlan勝出，即捐出十萬元，加上Harlan贏得各方好友嘅賭注數萬元，今次總共湊夠十七萬元善款捐畀小母牛，當晚由身兼小母牛香港分會副主席嘅葉澍堃代表接受大支票。

今次為期三個月嘅賣肉對決，Harlan共減去四十五磅，而Alvin就減咗三十七磅，兩位星級名廚齊齊瘦身成功，重拾健康。不過，莫樹錦醫生提醒，減肥最好循序漸進，如果太快就好易患上抑鬱症喎！

第一手消息請下載on.cc東網iPhone/iPad/Android/Windows Phone Apps