SUN搞作：打橫嚟講：二次創作對社會的好處
從未如此荒亂過的香港，叫人錐心刺痛、沉鬱想死之際，卻又見事事怪誕謬戾，極具搞笑反智之能事。有人聞者心顫，亦有人聽到都笑爆嘴，好鬼兩極分化！
特區政府早前大聲疾呼，戮力支持乜乜創意工業，更將香港僅有的兩個電視台牌照，瞬息間倍增百分之一百，表明政府如何重視「創意工業」，但係……（嗱！我唔係講今日立法會被圍堵的「政治事件」呀！）
我想講番前日，因「二次創作」的版權法例諮詢而喺立法會召開嘅公聽會，真係創意澎湃，好鬼開心的！淨係見到那批就座團體的「牌頭」，已過癮到震啦！計有：「瓦努阿圖終端機服務駐港聯誼辦事處（簡稱「終聯辦」），又有「睇肉、演偽、文化及出版怪」宮能組別，和「蘇軾粵語填詞同好會」的書記……完全合乎特首的創意期許啦！
由於此類公聽會的入場登記，可用任何組織名稱，所以，舊年，一群愛花善耕的朋友，合組「調理農務蘭花系」入去發表意見，仲畀大會認可提名發言添！
講番「二次創作」的版權問題，全球只得香港特區政府突然「嚴肅處理」。之前幾十年來，坊間一直改歌詞笑玩一通o架啦！有人將《帝女花》主題曲：「落花滿天蔽月光，借一附薦鳳台上」改成：「落番半邊百葉窗，與妹共瞓在床上」的了！唱到街知巷聞，幾時聽過原詞人唐滌生或任姐詐型嘅呢？
乜嘢係創作呢？就係荷里活有間大酒店，三個肥婆……可以在唱歌，或者學踢波，甚至數算緊六個波。
開開心心的再創作，讓社會怨氣得以宣洩，對民望低的政府也有好處哩！不過，一經蘇錦樑局長沾手，乜都變成政治暴風，昨天如是，今天就更加係！
彭志銘
次文化考古學家，對城中潮語有深入研究，博徵博引，廢官廢人行埋一邊。歡迎add我facebook一齊（目及）實政府
