SUN搞作：少膽虫手記：全霉語言偽術

「影埋啲垃圾，我炒晒你哋！」入到採訪部，少膽虫即刻見人就鬧，放眼望去，個個耷低晒頭扮聽唔到，「腦腫，我哋無做錯！」見到有新仔懶勁cosplay半澤直樹，少膽虫扮吓開明畀佢繼續講。「腦腫，又係你話去影『攞沙』，我哋按本子辦事啫！」

「個風叫羅莎呀！你當呢度啞視呀？」聽到如此弱智嘅理由，少膽虫動了真火，卻見眼前人無辜地嘟起嘴，嚷道：「成日都係咁，之前叫我哋去搵一男子，鬼知你要搵一個籃子咩！」

「呢份係你第一份工呀？」傻仔新人聽罷大叫：「幾多份都阻止唔到我堅持正義……」少膽虫馬上閘住佢：「你可以返屋企喇！」三秒過後，小學雞流下眼淚，頭也不回地拎紙皮箱執嘢。唉，少膽虫惟有奉勸佢忘了愛！曾經畢竟只是曾經，講清楚啲，魔童都晨早有牌啦！要喺社會生存，語言偽術係唔少得嘅。