政壇：白鴿黨搞特訓收買人命
我哋早前提過白鴿黨為咗一六年立法會選舉定咗張八人重點培訓名單，培訓計劃嘅負責人單仲偕尋日正式公布詳情，八人分別係林卓廷、蔡耀昌同六名區議員，包括屯門陳樹英、葵青尹兆堅、元朗鄺俊宇、南區柴文瀚、區諾軒同羅健熙。雖然該黨話名單同選舉冇直接關係，但當中各人已分晒區起動，當中乳鴿羅健熙仲負責晒全港，為選超級區議會鋪路。
每月得5000蚊津貼
該黨度咗五招重點特訓呢八隻老、中、青白鴿，包括要列席每周立會黨團會議、上特訓班學回應傳媒技巧、安排做唔同政策範疇嘅發言人、輪流出席電台論壇節目、海外訪問同資助佢哋搞地區活動，該黨最後會以曝光率作為評核準則。據了解，該黨所謂嘅資助，係每月實報實銷上限五千蚊津貼咁大把。
有乳鴿呻話所謂五招特訓都只係整色整水，津貼得嗰五千蚊，搞蛇齋餅糉都唔夠，除用嚟賣小巴廣告外，都唔知做得乜。至於做政策發言人，傳媒要搵都搵咗黨內嘅立會議員先啦，點會搵佢哋吖，要見報始終都係要靠自己諗計。講到計算見報率就更加「懸疑」，事關見報率多唔代表反應一定正面，負面新聞唔通又計入成績表咩？
班乳鴿最頭痕嘅係要參加特訓班，特別係要強制性出席「星期六學堂」，聽有「白鴿黨大腦」之稱嘅羅致光講課，如果出席率唔夠六成就分分鐘要被訓誡。有乳鴿無奈咁話禮拜一至五都要做地區工作同開黨內會議，禮拜日又要落區，只剩禮拜六可以抖吓，但依家都話要用嚟上堂，真係做到氣咳囉，簡直係收買人命。
