餐飲聯業協會會長黃家和日前喺社交網站自爆，話有晚凌晨駕車返屋企途中，喺大坑道轉左上黃泥涌峽道個彎位時，唔小心將架車駛過對面線少少，即時被守候已久嘅交警即場截停抄牌，罰款四百五十蚊兼扣三分。佢話日日返屋企都經過呢條路，差不多揸咗成三十年，都未試過出事，真係諗起都扯晒火。

黃家和日前深夜揸車返家被抄牌。（資料圖片）

黃家和話呢個彎位好陰濕，但自己揸咗三十年車都未試過被抄牌，家陣無啦啦罰錢兼扣分實在好唔甘心。由於佢打滾飲食界多年，喺社交網站講述抄牌遭遇，飲食界中人紛紛留言，最好笑係大家樂集團主席陳裕光留言「贈興」，話黃家和三十年先被罰四百五十蚊，除番開其實每年十五蚊，對佢嚟講好抵啦！

不過，呢番說話真係感染到黃家和，佢回覆陳裕光話，如果咁樣計法，即係每日畀四仙，真係幾抵喎！陳裕光聽到老友順番條氣後，仲安慰多一句，話既然三十年先罰一次錢，即係未來三十年都唔會出事啦！估唔到陳裕光諗嘢咁豁達，唔知黃家和領唔領會到呢？

第一手消息請下載on.cc東網iPhone/iPad/Android/Windows Phone Apps