政壇：黑莓救星曾創重組奇迹
智能手機生產商黑莓（BlackBerry）中止賣盤計劃，轉為重組救亡，被委任為臨時行政總裁嘅程守宗（John Chen）原來係喺香港出世，七三年移民美國，喺科技界以重組專家見稱，有分析仲話如果黑莓兩名創辦人一一年底下台後即由佢接棒，依家唔使搞成咁，可見對佢寄望甚殷。
程守宗強調短期內黑莓絕不賣盤。（資料圖片）
五十八歲嘅阿John過去最為人津津樂道嘅，莫過於將數據庫公司Sybase起死回生。佢喺九七年加盟Sybase，之前連蝕四年，研究機構Gartner甚至預言有七成機會「死亡」。點知佢入咗去之後，將發展焦點轉到當時尚喺起步階段嘅流動資訊管理，結果食正潮流，成功扭虧為盈，○九年以五十八億美元高價，賣畀德國軟件巨擘SAP，作價等於佢入去時嘅十五倍，直至今年初離開。
佢曾經講過將Sybase出售就好似嫁女咁，又話自己會繼續留喺科技界，因為冇其他技能咁喎。佢暫時未有透露佢嘅重組大計，但強調黑莓短期內絕不再賣盤。
不過，黑莓重組須同時間競賽，若唔計新注資嘅資金，以上季燒錢五億美元速度推算，公司手頭二十六億美元現金大概喺明年底耗盡，加上睇依家黑莓咁嘅情況，幾乎係「mission impossible」，真係替阿John擔心。
John掌舵Sybase前，曾喺西門子、Pyramid Technology等擔任高層，亦曾喺喬治布殊任總統年代擔任出口局要職。佢今年初加盟私募基金Silver Lake，擔任高級顧問，依家仍係華特迪士尼同富國銀行董事。
