政壇：黨友倒戈范國威現眼報
話說新民主同盟立法會議員Gary范國威有份嘅「香港本土」，早前因為刊登「源頭減人」廣告，兼且要政府收回內地單程證審批權，因而被人批評歧視新移民，搞到泛民主派上禮拜都要發出聯署聲明劃清界線，話反對歧視新移民。泛民嘅聯署聲明內嘅聯署人，除咗之前我哋報道過嘅新同盟丘文俊同容溟舟外，尋日仲傳出消息，指新同盟執委會已通過加入泛民嘅聯署聲明。咁咪即係倒戈？唔通Gary真係眾叛親離？
設計圖片
教新移民英語未發市
Gary就澄清話，執委會內部只係傾緊簽唔簽泛民聯署聲明，相反上禮拜六就議決會簽「香港本土」聲明，強調執委會唔認為「源頭減人」廣告有問題喎！不過，佢哋嘅大埔區議員關永業認為，雖然雙方都合理，但Gary立場可以寫得婉轉溫和啲，日後用「源頭減人」呢啲字眼都要小心啲，費事被人作口實話係歧視。
另外，有新同盟中人就批評，聯署呢件事顯露大佬文化，鬧Gary自以為是，無可救藥。話時話，以前Gary喺白鴿黨時，作為少壯派嘅佢經常狠批黨高層嘅大佬文化，如今被自己盟友批評大佬文化，真係現眼報囉！據講新同盟眾人都簽晒兩個聯署，補鑊成分甚重，睇嚟Gary要先安內，至可以攘外嘞。
另外，我哋尋日見到網上有一張相，話新同盟兩名區議員同教育中心合作，今日開始搞免費嘅「新移民家庭英語會話課程」回饋社區，令人聯想係咪同「源頭減人」廣告有關。有份合作嘅關永業話，其實係教育中心有意服務區內居民，問佢哋可唔可以幫手宣傳，成個月前已經籌備，但到依家都仲未「發市」。
咁又唔怪得嘅，Gary早前被人批評歧視新移民，依家又話幫啲新移民，新移民見到都唔敢參加啦！
