欲知天下事 東網話你知

今時今日，互聯網已經成為地球人生活嘅一部分，東方報業作為香港報壇一哥，一向走在時代尖端，引領潮流，所以，集團旗艦網站「on.cc東方互動」一直係本港最受歡迎、最多人瀏覽嘅網站，單月不重複瀏覽人數逾三百萬，瀏覽量每日逾二千萬頁次，唔到你唔服O架。咁都未算，東方報業秉承精益求精、與時並進嘅精神，對「on.cc東方互動」進行徹底革新，推出全新旗艦網站「on.cc東網」，務求更上一層樓，為讀者及網民帶來資訊新時代。

全新嘅「on.cc東網」究竟有乜特別？等太一叮話你知喇。新旗艦網站喺原有基礎上加強內容，新聞、財經、娛樂、體育、生活及評論，應有盡有，豐富多彩，而且因應唔同讀者需要，設繁體同簡體字選擇。最特別嘅係，「on.cc東網」按港澳、台灣、大陸及國際劃分新聞，井然有序，方便閱覽。嗱，首波率先推出台灣版，喺當地設立分社，建立強勁嘅編採隊伍，提供最地道、最詳盡嘅台灣新聞。當然喇，除咗面向台灣讀者，全球華人想了解寶島最新情況，亦可以上「on.cc東網」台灣版，保證令你滿意o架。

繼台灣版之後，「on.cc東網」亦會陸續喺大陸、美加、歐洲、澳紐等地建立分社，增聘當地記者，建立遍布世界嘅編採隊伍，為全球華人提供度身訂造嘅各類資訊。所以話，「上東網、知天下」，唔睇隨時走寶吖。

資訊時代講求速度及效率，東方報業透過龐大編採團隊，為「on.cc東網」打造最強即時新聞，每日廿四小時提供最快、最準確、最詳盡嘅資訊，再加埋大量圖片同短片，相得益彰。仲有吖，首頁頂部「焦點新聞」羅列當日最受注目嘅新聞，幫讀者掌握重要資訊，天下大事一目了然。

正所謂，東方出品，必屬佳品。東方報業係香港首屈一指嘅新聞權威，旗下《東方日報》及《太陽報》分別佔全港銷量第一及第三位，兩報讀者合共超過五百四十七萬人，真係冇花冇假。為咗方便讀者，「on.cc東網」將東方報業集團旗下刊物整合，喺網頁左側嘅Menu Bar，輕輕一按即可連接到《東方日報》及《太陽報》網頁同電子報，以及《好報》電子報、《FLASHoN》電子版同《ontv東方電視》，方便快捷。講到呢度，太一叮唔能夠唔賣花讚花香，電子報亦係當年東方報業首創o架，呢種以翻揭形式上網閱覽報章嘅創舉，又方便，又可以享受傳統閱報樂趣，簡直一舉兩得。

當然喇，今次改革亦唔少得《ontv東方電視》，除咗依照「on.cc東網」按地區劃分新聞之外，喺港澳地區更分設新聞、娛樂、財經、體育及生活五大頻道，務求令大家有全新嘅視覺享受。

最後提提大家，「on.cc東網」Android手機Apps今日同步推出，其他手機版本嘅Apps隨後亦會陸續更新。一句講晒，欲知天下事，東網話你知！