SUN奇古怪：SUN潮語：【o靚 界】
潮語「o靚界」，即係泛指高中至大學大專為主，年齡介乎十八、廿二嘅年輕族群。「o靚界」可以係學生，亦可以係做緊嘢，又或者唔知做緊乜嘢嘅人士，呢啲年輕人一般統稱為「o靚仔」、「o靚妹」。以前有套經典電影叫《靚妹仔》，其實就係講述八十年代初期，當時正值社會起飛，物欲橫流之下「o靚界」嘅社會實況。到咗今日「o靚界」自動衍生出一套自己嘅文化，同時亦隨住互聯網發達，「o靚界」文化有時仲會主導主流社會。「o靚模」同潮語都係其中之一，「o靚界」亦都同時係推動流行文化嘅主要力量。值得注意嘅係，「o靚界」亦可以細分為以十幾歲為主嘅「細o靚」同廿歲頭為主嘅「老o靚」。當然有啲三十九幾歲都喺度扮潮扮嘅「老潮童」就另作別論。
近年有學者提到，香港出現世代矛盾，有啲文化人同時事評論員甚至講到係「世代撕裂」咁嚴重。其實世代矛盾呢樣嘢，任何時代都有o架啦，只不過係以咩形式爆發出嚟嘅啫。喺每一個社會裏面，後生仔新一代，永遠係睇上一代唔順眼，而上一代嘅老SEAFOOD又會慨嘆一蟹不如一蟹，新一代水平低落。喺一百年前中國社會，一樣有一群後生仔年輕人，因為睇唔過眼年老一代嘅腐朽，結果搞咗一場革命出嚟，推翻咗滿清政府同喺中國行咗三千幾年嘅帝制，建立共和政體。二十幾年前，中國又有另一批年輕人，走上街頭抗議上一代人所組成嘅政府同領導階層，要求打倒官倒，剷除腐敗。結果係點？大家心照。所以所謂「世代矛盾」呢家嘢喺社會係必然存在，冇咩咁大不了。不過睇番香港地，我哋嘅「o靚界」，可以連「人無夢想同條鹹魚無乜分別」當成古語，我哋對「o靚界」又有咩期望呢？
「o靚界」人士其實係社會嘅未來，雖然今時今日嘅o靚仔o靚妹喺怪獸家長育成下，好似好唔掂，但係唔好唔記得，「o靚界」仲有一班學民思潮，都算係仲有一絲希望嘅……希望啦。
