官員一舉一動都備受關注，政務司司長林鄭月娥尋日出席理工大學「貧窮多面睇」活動開幕禮，有團體向領導扶貧工作嘅佢請願，並送上一個小型龍門同足球畀佢，希望佢將個波踢入龍門，但平時好順得人嘅林太就帶笑聽請願代表講嘢，點都唔肯踢個波，最後就由主辦機構之一、基督教香港信義會社會服務部總幹事狄志遠幫林鄭解圍代踢，睇真啲，林太當時着住高踭皮鞋，究竟佢係因為高踭鞋唔肯踢波？定係身為官員唔願隨便按示威團體要求去做呢？

設計圖片及對白

林太出席活動時，已有關注綜援收入聯盟成員在場請願，有團體呈上寫有滅貧目標嘅龍門後，就話希望佢踢波入龍門，象徵政府會訂立滅貧目標，出招一擊即中，呢個時候，只見着住高踭鞋嘅林鄭面有尷尬之色，雖然淡定聽代表講嘢，但就點都唔肯踢，身為主人家嘅狄志遠見狀，就一腳解圍，將個波踢入龍門。

狄志遠事後話，官員一般都好少接受示威物品，況且女士對踢波呢個動作可能覺得唔係幾好睇！

第一手消息請下載on.cc東網iPhone/iPad/Android/Windows Phone Apps