政壇：豪請鄉紳坐郵輪 發叔孤寒充闊佬
新界村代表仲有一年多就要改選，據聞唔少有意參選或競逐連任嘅人士已密鑼緊鼓，咁啱喺呢個時候，鄉議局主席劉皇發就請咗一班鄉紳上郵輪玩幾日，不過聽聞鄉紳要兩個人同住一間房，話有啲唔方便喎，唔知佢哋咁講係咪覺得發叔孤寒充闊佬呢？
劉皇發（左）同張學明（右）率領一眾鄉紳上郵輪玩幾日。
一班鄉事委員會主席早前已獲發叔贊助去上海參加國情研習班，月底又有一班成員去台灣交流。喺呢兩個旅程之間，據聞發叔又掏腰包請約二十名鄉委會主席、鄉議局成員及家屬上郵輪「海洋水手號」去台灣玩。一班鄉紳浩蕩出發，隨團嘅除發叔同佢囝囝劉業強外，仲有副主席張學明及多名鄉委會主席，包括元朗十八鄉梁福元、錦田鄉鄧賀年及上水鄉侯志強等，算係相當齊人。消息更話，原來梁福元同侯志強兩個猛男住埋同一間房，而且間房仲只得一張大床添，幾日流流長，唔知會有咩事發生呢？侯志強又會唔會半夜扎醒話要捉蛇呢？
