貪曾去賀孫大倫時行正門入，但就鬼祟由後門乘座駕離開，仲落埋窗簾遮到實。
「貪曾」前特首曾蔭權爵士任內貪盡海陸空、歎盡省港澳，廉政公署調查佢嘅貪腐案後，其行蹤一直鬼鬼祟祟。繼日前被本報影到佢同太太鮑笑薇秘密遊日本大阪後，尋日貪曾夫婦又連趕兩場飲宴，但佢哋由正門進場，「靜雞雞」走後門離開，搞到好似唔見得光咁，認真失禮主人家。
貪曾（右）一見新翁葉國謙就攬頭攬頸。
尋日中港照相器材主席孫大倫及立法會議員葉國謙同時娶新抱，前者喺灣仔會展中心擺酒，後者則喺尖沙咀洲際酒店設婚宴，唔少政商界人士都要港九兩邊走。一向鍾意「黐飲黐食」嘅貪曾當然唔會錯過機會啦，尋晚七點十五分，貪曾夫婦先乘坐政府嘅七人座駕抵達會展中心，笑笑口咁由正門進入會場，孫大倫親自上前迎接。
點知十五分鐘之後，貪曾夫婦好鬼祟咁走後門，並登上座駕離開，後座更落埋窗簾遮到實，但我哋仍隱約見到曾太張臉。直至八點十分，佢哋轉場抵達洲際酒店，貪曾一見到新翁葉國謙，即懶老友咁搭住對方膊頭，兩人繼而攬頭攬頸，懶係好傾咁，貪曾仲飲到十一點先走。無他嘅，當日泛民主派提出引用《立法會（權力及特權）條例》調查貪曾嘅貪腐案，建制派盲目反對護航。
第一手消息請下載on.cc東網
