政壇：兩黨友倒戈摑范國威一巴
當地球村已經成為現實時，再炒作地域性、歧視性議題就好易出事、甚至犯眾憎至被離棄，新民主同盟立法會議員范國威同公民黨（公文袋）毛孟靜，早前提出被指歧視新來港人士嘅「源頭減人」（取回單程證審批權）建議，成為眾矢之的，繼泛民主派同民間團體前日同佢哋劃清界線，另搞反歧視聯署聲明後，連范國威所屬嘅新同盟亦爆內訌，最少兩名新同盟區議員或會「過檔」參與泛民同民間團體嘅反歧視聯署聲明，有成員仲話從政者唔應該有歧視眼光喎，明摑范國威一巴。
設計圖片
范國威同毛孟靜搞咗個「香港本土」嘅組織後就周圍辣慶火頭，日前又突然發表「港人優先」聯署聲明，內容仍然好有針對性。但泛民同民間團體就搶閘提早發表反歧視聲明，合共有二十多名泛民議員同十多個民間團體加入聯署，當日已可見毛孟靜所屬嘅公文袋喺事件上意見分歧，阿毛變咗「獨家村」；點知新同盟亦一樣，范國威所屬嘅新同盟內部亦有異議，有成員不值范嘅倡議，寧願簽泛民同民間團體嘅反歧視聯署。
下屆連任有難度
其中新同盟沙田區議員丘文俊喺社交網站分享泛民嘅聯署聲明，亦想以其議員辦事處名義加入為聯署團體；另一「過檔」簽署聲明嘅係同為沙田區議員嘅容溟舟。容溟舟話，支持泛民聯署聲明主因係內容包容性較強，又意有所指話從政者無理由帶有歧視眼光，但佢依家暫未有意退出新同盟。
有知情人士更爆料，其實范國威同新同盟班兄弟嘅嫌隙始於兩個月前嘅「源頭減人」聯署廣告，據講當時范未有同新同盟兄弟商量，自把自為，事件發展至今幾近失控，被外界狠批歧視內地新來港人士之餘，連部分兄弟都唔撐，地區樁腳係立法會議員嘅根基，范國威搞到眾叛親離，下屆想連任都幾難。
