十九鄉村無水飲 十九官僚無良心
內地大導演張藝謀曾經拍咗部電影叫《一個也不能少》，講述一個小姑娘去到偏遠山區小學代課，為咗信守不會失去任何一個學生嘅承諾，不惜千辛萬苦出城尋人，為嘅只係要帶回一個因家貧而被迫輟學嘅孤苦學生。電影之所以動人，因為帶出人人生而平等的普世價值，唔會有人因為窮困而被放棄，唔會有人因為弱小而被輕視。
好嘞，連小姑娘都知照顧弱小一個不能少，點解港產官僚大人大姐反而不負責任，製造出一班施政孤兒仔呢？唔講唔知，香港自詡國際都會，居然有十九條鄉村至今冇自來水供應，村民一直被迫飲山水過活，落後程度連第三世界都不如。所謂一滴水看世界，偏遠村民被棄如敝履，呢幅就係港府麻木不仁嘅寫照！
追源溯始，呢筆欠水帳應該由八十年代講起。當年港府擬下一份名單，分階段為新界約七百五十條鄉村供應食水，一路搞到○三年，仍然有十九條偏遠鄉村無法享用源源活水千里來嘅自來水設施，而其中七條村被納入工務計劃。嗱，如果按照一個也不能少嘅人文精神，呢十九條村唔應該被棄之不顧，偏偏當局話之你，一句唔符合成本效益，供水計劃即時煞停，事隔十年嘞，七條曾被納入工務計劃嘅鄉村仍然冇自來水供應，其他鄉村更加供水無期。
咪以為冇自來水無乜問題吖，正如區議員話齋，離島多條鄉村未有鋪設自來水管，近年禽流感肆虐，村民擔心山水受野鳥糞便污染。傳染病醫生亦警告，山水有機會含有多種寄生蟲、細菌及病毒，市民不慎飲用，輕則嚴重肚瀉，重則破壞肝腎功能。港產官僚懶理村民死活，你話係咪豈有此理吖？
講到呢度，太一叮既感到慶幸，亦覺得遺憾。慶幸嘅係，好彩港產官僚冇去教書咋，以呢副冰冷心腸，被遺棄丟失嘅學生肯定不知凡幾。而遺憾嘅係，佢哋冇去教書，走去做官，受害嘅市民更加多不勝數。喂，一句成本效益，任由村民自生自滅，點都講唔通啦，你估依家係民智未開嘅蠻荒年代咩？香港假假地係金融中心，居然仲有人被遺棄，被迫靠山水過活，呢個係港府嘅可悲，更係香港嘅恥辱吖！
一句講晒，十九鄉村無水飲，官僚冷漠是禍因。如果港產官僚唔想自封「十九官僚」，必須速速向村民伸出援手。記住，一個也不能少吖，叮！
