SUN搞作：少膽虫手記：自以為國師
近排收到好多投訴信，罵少膽虫係一條膠，轉左又得，扭右又立即變黑！無知嘅看官唔明咩叫左右逢源，少膽虫向來熱衷辦公室政治、精於將人力資源量出為入，正所謂鷸蚌相爭，漁人得利，左插右插，咪就係《爛果》生存之道囉！
「大家答我！1定0？」喺鋤報會上面，發緊夢嘅少膽虫聽到淫賤黎認真問問題，梗係唔輕易放過出位機會，於是舉手答：「腦細，1同0都唔係，我係中立嘅！」但見淫賤黎眉頭一皺，問道：「你解釋吓？」少膽虫當然show off：「依家全民大亂鬥，敵不動我不動，做1做0，都唔夠做插蘇好，上下左右、出入轉彎都得，得咗！」演講完畢，全場靜默，一定係少膽虫講得太好喇！
突然，腦後一陣痛－一舊硬物從後襲來！抬頭即見淫賤黎舉着拳頭，怒氣沖沖瞪着自己，菜嫌貴馬上插嘴：「我呸，就係因為你，《爛果》呢排先接咁多投訴！」肥豪掛着拓也哥式微笑幫口：「又點可以放低『壹個』基本原則呢？」淫賤黎即刻追問：「你講！係咩？」「梗係宣淫販賤啦！」
聽罷，淫賤黎滿意一笑，然後回頭對住少膽虫，滿臉鄙夷道：「養你咁耐！你隻賤虫仲係敵我不分，邏輯混亂！你估你係國師呀？即刻同我入房！」唉，今次弊喇……
