城中鏡：朱鼎健兄弟權力贏活士
「世界高爾夫權力榜」每年都會喺高爾夫運動界同產業界，評選出對高爾夫傳統同世界高爾夫發展有貢獻嘅人，觀瀾湖集團主席兼行政總裁朱鼎健同副主席朱鼎耀今年就排名第十位，係唯一入圍十大嘅亞洲人，而佢哋喺今年新增嘅亞洲地區排名中更加雙雙問鼎榜首添！
觀瀾湖集團尋日喺海口舉辦「世界第一挑戰賽」，主席朱鼎健（左）同副主席朱鼎耀（右）邀請咗高球巨星老虎活士（左二）同麥爾萊（右二）出席。
其實，佢兩兄弟喺上年度已經喺權力榜排名第二十二位，今年更躍升至十大，比亞洲其他高爾夫發展歷史久遠嘅地區如日本、韓國等排名更高，真係犀利。連朱鼎健都話今次排名為中國高爾夫發展打咗支強心針。而香港人都好熟悉嘅世界高爾夫巨星老虎活士今次就喺權力榜排第十七位。
其實，尋日除咗係權力榜派成績表外，亦係觀瀾湖集團喺海口舉辦「世界第一挑戰賽」嘅大日子，老虎活士同另一世界級高球巨星麥爾萊（Rory Mcllroy）都獲邀出席。唔怪得朱鼎耀都話對呢場賽事十分期待啦！
