城中鏡：史宗瑋演講猛人港大撐場
香港大學尋日舉行傑出學人講座，邀請咗為facebook寫第一個商用程式、現任星巴克董事嘅美籍華裔喺香港出世嘅女強人史宗瑋演講，分享企業宣傳喺互聯網世代嘅蛻變。台上猛人演講，台下星光熠熠，商務及經濟發展局前局長「肥亨」馬時亨更全家總動員撐場。肥亨謙稱唔熟科技先嚟聽吓書，仲揭發前財爺「阿松」梁錦松原來係「機佬」添！
四歲移居美國嘅史宗瑋，回港出席港大傑出學人講座。
肥亨（左）踢爆阿松（右）係「機佬」。
講起政商界對社交媒體運用嘅睇法，肥亨即時將個波拋畀阿松，笑言佢最熟社交媒體喇，阿松尷尬否認，仲話「咁你即係話我係『機佬』啫？」
阿松「借機」撻着小伏
「機佬」身份被揭穿，阿松承認同太太「小伏」伏明霞不時都會透過facebook、WhatsApp傳情，平日就算忙緊公事都一定會聽仔女電話。相信所謂「機佬」嘅由來，係源於阿松當年借出手上嘅Palm畀初相識嘅小伏而撻着，最終抱得美人歸嘅愛情故事喇。
金刀梁自嘲活於石器時代
至於港大校務委員會主席梁智鴻就自稱係「石器時代」嘅人，黑莓手機在手嘅佢堅持以睇症嘅方式同家人聯絡，就係大家坐喺度慢慢傾喇！
金刀梁覺得無論科技幾咁進步，維繫家人感情都係要見面，仲話「唔通喺電話度同病人診症咩！」
