被譽為「長勝將軍」嘅立法會足球隊,其實以往都係靠外援「請槍」入波嘅,舊年有十八位議員強勢加盟,當中唔少係年輕力壯嘅生力軍,個個都矢言要幫立會延續不敗神話。新會期伊始,雖然足球隊繼續維持多場不敗紀錄,卻爆發一股退會潮,有六名隊員就以老弱傷殘等理由決定退出,令足球隊剩番十三人。

設計圖片及對白

雖然今年有旅遊界姚思榮加盟,但退出嘅隊員包括胡志偉、郭榮鏗、張超雄、范國威、謝偉俊同Ben陳恒鑌。胡志偉話未來一年工作好忙,為免報咗名又唔見人,決定今年唔再報名,等有比賽時先夾時間參加。阿Ben話細細個扭傷腰後一直未好番,要休養生息,來年再戰江湖,而張超雄就話自己年事已高,擔心再夾硬嚟擔心會跌斷啲骨。

「長毛」梁國雄雖冇退出,但佢前日因踢波而整親隻左腳,之後仲入埋醫院接受治療。據佢身邊人透露,佢未來六個星期都要臥床休養唔可以返立會開會,但非常硬頸嘅長毛就揚言下月六號會向醫院申請「保外就醫」,返立會就係咪引用特權法查免費電視發牌一事投贊成票。

隊長陳克勤分析,大部分球賽都安排喺星期六、日舉行,而呢啲時間正正係直選議員落區同居民拉關係嘅黃金時間,所以有隊友退出都可以理解。佢透露來年會有四場比賽,秘書處正研究容許立會保安同職員參加比賽,等冇乜議員參加時都有啲立會職員頂住。

第一手消息請下載on.cc東方互動iPhone/iPad/Android/Windows Phone Apps