政壇：卓百德教婆婆投資掂晒
Portwood Capital主席卓百德雖已過花甲之年，但就愈做愈起勁，未有退休之意。不過，原來佢對退休投資非常有心得，最近佢話教咗個七十三歲婆婆做投資，仲氹到個婆婆非常之開心。
卓百德一手包辦，幫婆婆開戶同選股。（資料圖片）
話說當初呢個婆婆同卓百德講，擔心退休金全部放喺銀行，始終會有一日坐食山崩，希望能夠改善現狀。卓百德好自然就叫佢做投資啦，點知唔講尤自可，一講個婆婆仲驚，話驚投資會蝕錢，連棺材本都冇埋。佢就同婆婆解釋，其實有啲投資風險都好低嘅，但婆婆始終都係半信半疑。
幫人幫到底，卓百德索性幫婆婆開埋投資戶口，幫婆婆選股，成個投資組合全部都係房託基金（REIT），真係貫徹咗卓百德「樓神」嘅稱號。過咗一段時間，到咗公司派息期，卓百德話收到婆婆嘅電郵，話多謝佢，因為婆婆已經喺信箱收到派息嘅支票，可以攞住呢啲錢去買衫、整頭髮同出街食餐好嘅，當初嘅擔心全部唔見晒。
