政壇：貪曾遺禍機場地勤憂心
「貪曾」前特首曾蔭權爵士同太太曾鮑笑薇喺上周末秘密遊日返港，經機場貴賓特別通道入境，他們離開機場時有地勤人員好心向貪曾夫婦示意小心出口自動玻璃門，因此出現疑似「摑」到曾太疑雲。
急急腳上車 老婆跟住跑
據聞事件曝光後令該名地勤人員好困擾，其實一切都係角度問題，講到尾最衰都係貪曾行蹤鬼祟藏頭露尾累事，否則曾太唔使急急腳咁走好似做錯事咁，之後自不然無怪錯好心人嘅情節喇！
貪曾上周秘密去咗日本大阪「疏乎」五日四夜，星期六返港，貪曾「疏乎」返港，離開機場時一個箭步衝上座駕，曾太急急腳咁追住佢，地勤人員好禮貌咁遞起隻手，好心提醒曾太小心自動玻璃門，不過喺電光火石間，曾太就喺咁衝咗埋去，搞到該名地勤人員隻手好似接觸到曾太塊面咁。
因為呢次疑似「掌摑」事件，據聞該位地勤人員好困擾，受到唔少壓力，其實佢都係盡忠職守啫。
正所謂「冤有頭債有主」，最衰貪曾一直無全面交代各項醜聞，否則點會次次出入都要左閃右避，甚至乎連累咗其他人都唔知，貪曾如果有一日懂得知所進退，呢個將會係佢近年一大「貢獻」！
