今年地方行政高峰會「一拆四」,由民政事務局局長曾德成做主打,尋日第一場由區議員各抒己見,較有創意嘅建議包括民選民政專員同區議會一次過取得一屆撥款,德成局長話乜都可以考慮喎。係咪真㗎,睇吓政府之後點做,就可以印證德成局長係咪hea答囉?

設計圖片及對白

政府尋日就喺港島搞第一次專題論壇,但唔少議員同地區人士都係主力爭取加建地區設施,差啲變咗「聲討」大會。南區區議員麥謝巧玲同埋楊位款,分別都話其他區都有文娛中心、暖水池,要求政府加建。

示威者慳番啖氣費事去

南區區議員羅健熙就要求政府檢討畀區議會多啲錢、人、權。同區區議員柴文瀚直頭建議,民政專員將來要由選舉產生。中西區區議員陳學鋒就建議政府一次過畀一屆撥款,而唔係一年一年咁畀區議會。離島區議會增選委員鄺惠娟話長洲太平清醮「齋戒沐浴蕩然無存」,希望政府勸喻唔好食肉。

德成局長話唔排除選舉產生民政專員可能性,連財政自主權都可檢討,即係乜都可以考慮。對於食齋,佢話政府好難叫人唔食。勞福局局長張建宗就不停推銷長生津、兩蚊搭車優惠等政策,佢真係可以做「最佳推銷員」。

論壇只係得局長常秘等官員出席,四場之後,官員至向特首總結意見。或者見到呢個「陣勢」,連示威者都慳番啖氣唔到,但唔知新聞官係咪「護主心切」,記者喺休息時間,唔好話接觸唔到局長,連同班區議員傾偈都唔畀,新聞官仲「邀請」記者去記者室,呢招咪即係「隔離」,點解要咁做,真係令人費解。

第一手消息請下載on.cc東方互動iPhone/iPad/Android/Windows Phone Apps