讀者人數創新高 東方太陽齊報捷

唔係太一叮賣花讚花香o架。根據市場研究公司Oracle Added Value今年七月嘅最新調查，《東方日報》讀者人數超過三百七十六萬八千，比前年十月增加近三萬六千人，連續三十七年全港銷量第一；而《太陽報》升勢更勁，讀者人數達到一百七十萬有多，比前年十月增加近七萬人，連續十四年穩佔全港銷量第三位。兩報合計，讀者人數超過五百四十七萬，減去兩報讀者重疊嘅部分，讀者人數約佔全港人口比例五成八，即係話兩個香港人之中，就有一個係東方報業集團嘅讀者，唔到你唔服！

珠玉在前，有爛果報之稱嘅《蘋果日報》簡直係相形見絀。最新調查顯示，爛果報讀者少咗一萬六千人，銷量好似王小二過年咁，一年不如一年。唔怕唔識貨，最怕貨比貨，《東方日報》讀者人數比爛果報多一百三十五萬，如果雙劍合璧加埋《太陽報》，讀者人數更加比爛果報多三百萬，即係多一點二七倍，直情係拋離九條街喇。所以話，讀者眼睛係雪亮嘅，壹淫媒誨淫誨盜，淪為過街老鼠，旗下嘅《爽報》已經摺埋，睇怕爛果報他朝君體也相同吖。

東方兩報除咗銷量節節上升，讀者質素仲高人一等添。根據市場研究公司Ipsos最新調查，兩報讀者之中，約三成在職人士係僱主、行政人員或專業人士；三成讀者係大學程度或以上；讀者平均家庭收入三萬六千元，遠高於全港家庭平均水平。最值得一提嘅係，三成半讀者已閱讀《東方日報》達十五年或以上，四成半讀者閱讀《太陽報》五年或以上。

事實勝於雄辯，有高質素報紙，自然有高質素讀者；有高質素讀者，自然有高質素購買力，精明嘅廣告客戶自然識得選擇喇！

有人可能會問，呢啲調查靠唔靠得住o架？嗱，兩間市場研究公司都大有來頭o架，Oracle Added Value係全港市場調查公司第一位，喺全球十四個國家設有分公司；而Ipsos前身係Synovate，位列全港市場調查公司第二位，唔少廣告公司及大型客戶都採用其調查數據。所以話，以上調查嘅權威性及公信力絕對毋庸置疑，珍珠都冇咁真。

唔好忘記喎，東方報業集團嘅網站同樣大受歡迎o架。五成三讀者曾瀏覽on.cc網站，其中超過八成月入三萬元以上，近七成係大學程度，六成為三十歲以下人士。正所謂，有麝自然香，東方報業集團堅持正義，為民喉舌，成為香港人嘅報紙係理所當然，成為廣告客戶嘅最愛更加係順理成章。太一叮除咗多謝各位捧場之外，亦應承大家，我哋一定會再接再厲，務求做到更好！