城中鏡：張樹槐撒哈拉沙漠毅行
恒生銀行傳訊及企業可持續發展總監Walter張樹槐熱愛馬拉松，最近仲將呢份喜好變成慈善，完成撒哈拉沙漠毅行，成功籌得二十萬元，為非洲逾千人提供供水設施。
張樹槐為慈善勇闖撒哈拉完成沙漠毅行，幫非洲逾千人提供供水設施。
佢花名叫「水哥」，幫國際非政府組織WaterAid籌款，得心應手喇！支持佢嘅包括「老細」李慧敏、執董薛關燕萍及馮孝忠、恒地非執董歐肇基、新地執董陳國威、公關和廣告公司老闆、多位上市公司嘅傳訊主管，以及資深傳媒工作者。
今次遠赴北非撒哈拉沙漠完成約一百公里毅行，係佢繼去年成功挑戰世界第一峰珠穆朗瑪峰馬拉松後嘅新嘗試。呢次毅行活動嘅九十七位參加者來自十六個國家或地區。當地最高溫度為攝氏五十一度，為咗補充體內水分嘅消耗，每名毅行者平均每日要飲十公升水，另外，身處沙漠，亦要抵受七日冇涼沖。
不過，原來最令佢難忘嘅，係晴空萬里、浩瀚黃沙嘅壯觀景致。由於冇光污染，夜空嘅星光特別明亮，仰望繁星，頓感人之渺小。
