城中鏡：「綠茅」轉色免惹笑
香港國酒茅台之友協會日前成立青年委員會，以推動年輕人品嘗茅台酒，首屆青委主任由莊士機構執行董事Albert莊家彬擔任，而家族收藏唔少頂級茅台酒嘅百仁基金副主席Johnny楊華勇就擔任青委顧問，相信佢嘅茅台知識可以傳授畀大家，佢仲即席教授防止不法之徒賣假茅台酒嘅方法。
吳永嘉為茅台之友青委會特別訂製專用嘅紫色樽茅台酒。
茅台之友青委會成立，莊家彬（左）、楊政龍（中）及楊華勇（右）拍住上推動年輕人品嘗茅台酒。
保良局前主席梁寶珠千金林玉茵（左）同潮州商會青委副主任林淑怡（右）都淺嘗茅台。
由於Johnny愛茅台，而爸爸楊孫西更係茅台之友協會監事長，家中閒閒地有逾百支茅台坐鎮，正因為消耗量大，「吉樽」自然多。為免不法之徒收集舊樽賣假酒，Johnny話唔會亂丟空樽，寧願放喺屋企當擺設，結果愈擺愈多，朋友到訪見到都嚇一跳。
講番茅台之友青委會，啱啱成立就有逾百名會員，除咗主任Albert外，仲有香港青聯主席霍啟剛、英皇集團企業行政主任楊政龍、廖創興家族後人廖偉麟等人。難得咁高興，茅台之友協會副會長吳永嘉特別訂製專用酒。佢話協會一向用藍色樽五十年茅台，原本想為青委會選用青綠色樽，寓意朝氣勃勃，點知一問之下，「綠茅」嘅普通話發音同「綠帽」好似，為免貽笑大方，於是用紫色樽穩陣啲。
首批限量6000支
首批訂製嘅「紫茅」年份約十五至二十年，一共有六千支，只供會員認購，想擁有就要入會或託會員買喇。不過，時下後生仔愛飲紅酒居多，想推動年輕人飲茅台，真係要諗吓橋至得，所以Albert就構思舉辦首屆茅台雞尾酒大賽，又計劃將茅台入饌，嚟個創意烹飪比賽喎！
