SUN搞作：打橫嚟講：香港創意無限大
常言道，有創意，先有新鮮感。
世界，係需要奧巴馬精神：「change」的！
早前，香港有兩則小新聞，大家應忽略咗的了！因沒有大吵大鬧之故！
呢兩樁短聞，都有突破性的開創。先講屏山天水圍公共圖書館同一個青年團體合辦咗個「夜遊圖書館」活動，讓七十七個來自天水圍和元朗的中學生喺圖書館內「借宿一宵」。最有意義的，係叫同學們到平台「觀星」，點知，一顆也看不到，讓他們得悉香港光污染的禍害。天星係有嘅，不過人為摧毀而已。
館方亦打破公共圖書館五十多年來的禁例，隨通宵開放外，仲一改館內「不准喧嘩」的規定，讓同學仔自由地暢所欲言。
第二單小新聞，亦有「通宵開放」舉措的活動，是香港歷年嚟最大規模嘅恐龍展覽（下月八日起）。展品有真恐龍的化石和恐龍蛋睇不在話下，展方話今鋪亮點，叫做「恐龍夜派對」，係畀家長帶啲小朋友喺館內「留宿一晚」，好等小童「感受睡在恐龍腳下的滋味」喎（但係要畀參加費嘅）！另一賣點，話有三隻「機械恐龍」，內藏感應器，只要小朋友揸住一把附有感應功能的「武器」，喺恐龍面前撩佢，恐龍就會搖擺同發聲，甚至「放屁」喎！嗱！睇落好玩吧！今劑小朋友用木棍「武器」撩恐龍好好玩，下次，佢哋去到動物園，咪自然懂得「撩老虎」囉！強國人遊動物園，每每用水樽掟獅子、大笨象，咪係咁原理囉！
細路仔是無知無辜的，你今晚畀佢喺圖書館大聲講嘢，第二日又點解唔准呢？點解你話得就得，話唔准就唔准呢？
大人的創見，一定是好的「change」嗎？值得研究研究！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
