政壇：立會保安同司機爭房用
由於立法會中環舊大樓搬到添馬艦，細屋搬大屋，需要嘅保安人員亦都多咗，立法會於是請多咗幾十個保安員，令團隊增至九十人。但原來班保安大哥喺舊大樓時已冇特定嘅休息室，所以搬去新大樓後，佢哋首要爭取目標就係一個專用休息室，亦因為咁而掀起佢哋同一班議員司機嘅房間爭奪戰。
唔知係咪班保安大哥人多勢眾，聲都大啲，秘書處將原本供秘書處同議員司機使用嘅休息室改為保安人員休息室。班司機大佬就暫時被安排去地下公眾人士入口升降機隔籬一間房。
盛傳呢間房原本係「爆炸品處理房」，立會萬一收到爆炸品或可疑郵件，就會喺呢間房「拆彈」。但據我哋了解，後來立會認為冇咁嘅需要，所以呢間房就預留畀文件收發組用。
但由於文件收發組要處理嘅郵件日益增多，面臨逼爆危機，將會收番依家嘅司機休息室，令班司機又面臨「迫遷」，真係佛都有火。為平息紛爭，秘書處早前已要求建築署喺新大樓LG1、即地庫第一層停車場設立一間司機休息室，有關工程已接近完工，預計本月底就可開放。希望班司機可以有個安樂窩啦！
