立法會地產及建造界議員「大舊石」石禮謙，最近除要求政府將穩定樓市措施「減辣」外，尋日仲喺立法會口頭質詢教育局，查詢法律專業證書課程（PCLL）嘅取錄情況。法律界議員Dennis郭榮鏗就踢爆，原來大舊石修讀緊大學法律課程，仲話以大舊石嘅聰明才智，入讀PCLL應該唔難。原來大舊石提質詢係幫自己問出路，但佢好似漏咗申報利益喎！

現時喺大學修讀完法律學士課程嘅畢業生，要讀埋PCLL先可以做執業律師。大舊石就質詢教育局有關PCLL嘅取錄情況。Dennis又話，現時每年本地修讀法律學位嘅畢業生約有七百人，外國畢業生就有一千四百多人，但本港PCLL學額就只有約六百個，可以話係僧多粥少。所以Dennis同其他議員都叫當局諗諗計，增撥資源畀大學開多啲PCLL學位。

第一手消息請下載on.cc東方互動iPhone/iPad/Android/Windows Phone Apps