政壇：股神銀包手機用足廿年
股神巴菲特早前接受CNN訪問，公開自己嘅銀包同手機畀觀眾睇。雖然身家有成五百八十五億美元，但由佢嘅銀包同手機已經睇到，股神念舊之餘，亦好忠於自己嘅投資！
巴菲特早前公開自己用咗二十年有多嘅銀包同手機。（資料圖片）
巴菲特應主持人要求，拎咗好有「歷史價值」嘅手機同銀包出嚟，無論係手機、銀包都用咗超過二十年。喺人人都用智能手機嘅時代，佢仍然用緊二十幾年前嘅諾基亞摺機，仲話自己每樣嘢都用超過二十五年先會扔，證明佢份人「慳家」又念舊。
而佢嘅銀包同樣用咗超過二十年，入面除有銀紙外，一張全家福就顯示巴菲特係一個顧家嘅男人，但令人最深刻都係佢張一九六四年發行嘅美國運通信用卡。原來早喺五十年前，股神已經係美國運通嘅「用家」，依家佢就持有美國運通市值九十五億美元嘅股份。喺○八年金融海嘯後巴菲特睇好銀行股，注資支持美國運通同其他企業，呢啲投資亦冇辜負巴菲特嘅支持，事隔五年已經為佢進帳百億美元喇！
